close
Sayahna Sayahna
Search

കേരളപാണിനീയം: “സായാഹ്ന” പതിപ്പിന്റെ പ്രത്യേകതകള്‍


കേരളപാണിനീയം

ഒന്നു്
മലയാളത്തിന്റെ സമഗ്രമായ തനതുലിപിയിലാണു് ഈ പതിപ്പിറങ്ങുന്നത്. ഏ.ആര്‍. രാജരാജവര്‍മ്മയുടെ മേല്‍നോട്ടത്തില്‍ 1917-ല്‍ അച്ചടിച്ചിറങ്ങിയ കേരളപാണിനീയത്തിന്റെ ഏറ്റവും സത്യസന്ധമായ പതിപ്പാണിതു്.
രണ്ടു്
കമ്പ്യൂട്ടര്‍ ടൈപ്പ്സെറ്റിംഗ് (ഡി.റ്റി.പി.) പ്രചരിച്ച കഴിഞ്ഞ മൂന്നു ദശകങ്ങളില്‍ കേരളപാണിനീയത്തിന്റെ വ്യത്യസ്ത പതിപ്പുകള്‍ പല പ്രസാധകരും ഇറക്കുകയുണ്ടായി. പരിഷ്കരിച്ച ലിപി ഏറ്റവും വിനയായിത്തീര്‍ന്ന കൃതിയാണു് കേരളപാണിനീയം. ഏ.ആര്‍.ആര്‍. ഉപയോഗിച്ച പല ലിപിചിഹ്നങ്ങളും ഈ പതിപ്പുകളില്‍ നിന്നും അപ്രത്യക്ഷമായി. സംവൃതോകാരം അപ്പാടെ ഇല്ലാതായി. ൠ, ഌ, ൡ, ഺ (half റ്റ), ഩ (other ന) എന്നിങ്ങനെ കാണാതായതെല്ലാം വീണ്ടെടുത്തു് മൂലകൃതിയിലേതുപോലെ വിന്യസിച്ചിരിക്കുന്ന ഏക ആധുനിക പാഠമാണു് സായാഹ്നയുടേത്.
മൂന്നു്
ഡിജിറ്റല്‍ ടൈപ്പ്സെറ്റിംഗിന്റെ അവസാന വാക്കെന്നു കരുതപ്പെടുന്ന ‘ലാടെക്’ (LaTeX)-ന്റെ മലയാള സംവിധാനം ‘ഇതള്‍’ (www.ithal.io) ഉപയോഗപ്പെടുത്തി യൂണികോഡില്‍ ചെയ്ത ഏക പതിപ്പാണിതു്. ഏതൊരാള്‍ക്കും എപ്പോള്‍ വേണമെങ്കിലും സൗജന്യമായി ഡൗണ്‍ലോഡ് ചെയ്യത്തക്കവിധം കേരളപാണിനീയത്തിന്റെ ഡിജിറ്റല്‍ പതിപ്പ് സായാഹ്നയില്‍ ആര്‍ക്കൈവ് ചെയ്തിരിക്കുന്നു. നൂറ്റാണ്ടുകള്‍ കഴിഞ്ഞാലും ഈ ഡിജിറ്റല്‍ പാഠത്തിനു് കേടുകള്‍ പറ്റാതിരിക്കാനായി XML ഫോർമാറ്റിലാണ് സൂക്ഷിച്ചിരിക്കുന്നത്. ക്രിയേറ്റീവ് കോമ്മണ്‍സ് എന്ന സ്വതന്ത്ര പകർ‌പ്പവകാശത്തിലായതിനാല്‍ കേരളപാണിനീയത്തിന്റെ ഈ പതിപ്പു് എല്ലാ കേരളീയരുടേയും (എല്ലാ ജനതയുടേയും) പൊതുസ്വത്തായി മാറുകയാണ്. മാര്‍ക്കറ്റില്‍ ഇന്നു പ്രചരിക്കുന്ന മറ്റെല്ലാ കേരളപാണിനീയവും കുത്തക സോഫ്റ്റ്‌‌വെയറുകള്‍ ഉപയോഗിച്ചുണ്ടാക്കിയവയും സ്വകാര്യവല്‍ക്കരിക്കപ്പെട്ടതുമാണ് എന്നോര്‍ക്കുക.
നാലു്
ധാതുപാഠം, കാരികാസൂചിക എന്നീ പരമ്പരാഗത സൂചികകളോടൊപ്പം ഒരു പദസൂചിയും (keyword index) ഇതിലുള്‍പ്പെടുത്തിയിരിക്കുന്നു.
അഞ്ചു്
മേല്‍ചൊന്ന മൂന്നു സൂചികകളും കേരളപാണിനീയത്തിന്റെ ഡിജിറ്റല്‍ പതിപ്പില്‍ ഹൈപ്പര്‍ലിങ്കുകളായി പ്രവര്‍ത്തിക്കുന്നു. ഉള്ളടക്കം ‘ബുക്ക് മാര്‍ക്ക്’ (bookmarks) ആയിത്തീര്‍ന്നിരിക്കുന്നു. ഒരൊറ്റ മൗസ് ക്ലിക്കു കൊണ്ട് പാഠത്തിന്റെ ആഴങ്ങളിലേക്കിറങ്ങിച്ചെന്ന് ഏതു ഭാഗവും അനായാസം കണ്ടെത്താനും പാരായണം ചെയ്യാനും ഇതുമൂലം സാധിക്കുന്നു.
ആറു്
പുസ്തകത്തിന്റെ പുറത്തുള്ള ക്യൂആര്‍ കോഡ് (QR code) സ്കാന്‍ ചെയ്യുന്നതോടെ കേരളപാണിനീയത്തിന്റെ ഹൈപ്പര്‍ ടെക്സ്റ്റ് സ്മാര്‍ട്ട് ഫോണില്‍ ഉടനടി ലഭ്യമാകുന്നു. എല്ലാ ഇന്‍ഡക്സുകളിലൂടെയും കേരളപാണിനീയത്തിന്റെ ഉള്ളടക്കം സൂക്ഷ്മതലത്തിൽ‍ ഉപയോക്താവിന്റെ മുന്നില്‍ തുറക്കപ്പെടുന്നു.
ഏഴു്
വെറുമൊരു ‘പാഠം’ (text) എന്നതിലുപരി ഒരു ‘വിവരവ്യവസ്ഥ’ (information system) ആയി മാറുകയാണ് സായാഹ്നയിലൂടെ കേരളപാണിനീയം.