close
Sayahna Sayahna
Search

മടക്കം


മടക്കം
PranayamOralbum.jpg
ഗ്രന്ഥകർത്താവ് വി എം ഗിരിജ
മൂലകൃതി പ്രണയം ഒരാൽബം
രാജ്യം ഇന്ത്യ
ഭാഷ മലയാളം
വിഭാഗം കവിത
ആദ്യപതിപ്പിന്റെ പ്രസാധകര്‍ ചിത്തിര പബ്ലിഷേഴ്സ്
വര്‍ഷം
1997
മാദ്ധ്യമം പ്രിന്റ്
പുറങ്ങള്‍ 117
ISBN 81-86229-02-07
വായനക്കാരുടെ പ്രതികരണങ്ങള്‍ ഇവിടെ രേഖപ്പെടുത്തുക

മടങ്ങിപ്പോവുക മരത്തിലേക്ക്
എന്നിലകളോടവന്‍ പറയുന്നു,
തിരിച്ചുപോവുക തളിരിലേക്കെന്ന്
തരിമുകുളത്തോടവന്‍ കയര്‍ക്കുന്നു
വിത്തിന്നിരുളിലേക്കു നീ
ചുരുണ്ടു കേറുക-
ഇളംനാമ്പിനുത്തരവു നല്‍കുന്നു.
തിരിച്ചുപോവുക തിരിയിലേക്ക്
അതുകൊളുത്തിയ തീയിന്‍
ചുടലയിലേക്ക്
തെളിനാളത്തൊടും കലമ്പുന്നൂ.
മറവിയിലേക്ക് മരിച്ചടങ്ങുക,
പ്രണയത്തിന്നവന്‍
പരുഷമായാജ്ഞ കൊടുക്കുന്നു.
“വിയത്തിലേക്ക് നീ മടക്കമില്ലാതെ
ചിറകുകൾ നീർത്തിപ്പറന്നുമായുക..”
നിറകണ്ണോടെ ഞാന്‍
അവനോടോതുന്നു.

(1995)