close
Sayahna Sayahna
Search

ഇരുളുന്ന സൂര്യന്‍


ഇരുളുന്ന സൂര്യന്‍
PranayamOralbum.jpg
ഗ്രന്ഥകർത്താവ് വി എം ഗിരിജ
മൂലകൃതി പ്രണയം ഒരാൽബം
രാജ്യം ഇന്ത്യ
ഭാഷ മലയാളം
വിഭാഗം കവിത
ആദ്യപതിപ്പിന്റെ പ്രസാധകര്‍ ചിത്തിര പബ്ലിഷേഴ്സ്
വര്‍ഷം
1997
മാദ്ധ്യമം പ്രിന്റ്
പുറങ്ങള്‍ 117
ISBN 81-86229-02-07
വായനക്കാരുടെ പ്രതികരണങ്ങള്‍ ഇവിടെ രേഖപ്പെടുത്തുക
സ്ത്രീക്കു സ്നേഹം
ചവിട്ടുന്ന മണ്ണും
ജ്വലിക്കുന്ന സൂര്യനുമാണ്,
പക്ഷേ
അവള്‍ ആ സ്നേഹത്തിനെ
വീടായി പണിയുന്നു
ഒരു കിളിവാതില്‍പോലുമില്ലാത്ത
കിടപ്പുമുറിയിലെ
കൊഴുത്ത ഇരുട്ടായി
ഉരുട്ടിയെടുക്കുന്നു
നിശ്ശബ്ദമായി അന്ധമായി
ശരീരത്തിലമരുന്ന നനഞ്ഞ
പഞ്ഞിക്കെട്ടായി
പിറവിക്കരച്ചിലിന്റെ
അഭിമാനസ്തംഭമായി,
മാറ്റിയെടുക്കുന്നു,
അവള്‍ ആ മണ്ണു കുഴച്ചു
ദൈവത്തെയും
കുഞ്ഞിനെയും
ചോറും കിണ്ണവും വാര്‍ക്കുന്നു…
സൂര്യനെ താലിയാക്കുന്നു
സ്നേഹം ഒഴികെ
എല്ലാം അവശേഷിക്കുന്നു.