close
Sayahna Sayahna
Search

ടിങ് ടിങ്


സെബാസ്റ്റ്യൻ

ചില്ലുതൊലിയുളള തവള
ChilluTholi-01.jpg
ഗ്രന്ഥകർത്താവ് സെബാസ്റ്റ്യൻ
മൂലകൃതി ചില്ലുതൊലിയുളള തവള
രാജ്യം ഇന്ത്യ
ഭാഷ മലയാളം
വിഭാഗം കവിത
ആദ്യപതിപ്പിന്റെ പ്രസാധകര്‍ മാതൃഭൂമി ബുക്സ്
മാദ്ധ്യമം അച്ചടിപ്പതിപ്പ്
പുറങ്ങള്‍ 64

ടിങ് ടിങ്

ഇത് സീററുകളില്ലാത്ത ബസ്സ്
ഇരിക്കണമെങ്കില്‍ കസേര കൊണ്ടുവരണം
പിടിച്ചു നില്ക്കണമെങ്കില്‍ കൊണ്ടുവരണം കയറോ കമ്പിയോ
ഓടുമ്പോള്‍ വീഴാതിരിക്കാന്‍
കമ്പക്കൂത്താടിയുടെ സാമര്‍ത്ഥ്യം വേണം.
ടിക്കറ്റെടുക്കേണ്ട
അടുത്തു നില്ക്കുന്ന ആളോട്
‘സമാധാനം’ എന്നു പറഞ്ഞാല്‍ മതി.
യാത്രക്കാരില്‍ പരിചയക്കാരെ കണ്ടാല്‍
കണ്ട ഭാവം നടിക്കരുത്.
ഇടങ്കാല്‍ വെച്ചു വീഴ്ത്താം
ഉന്തിയിടാം.
കണ്ടക്ടര്‍ ഇല്ല
കരച്ചിലാണ് ഇറങ്ങുവാനുള്ള സിഗ്നല്‍
പൊട്ടിക്കരഞ്ഞാല്‍ വണ്ടി സഡന്‍ ബ്രേക്കിട്ടു നിര്‍ത്തും
പൊട്ടിച്ചിരി
വണ്ടി പോകുവാനുളള സിഗ്നലും.
ടിങ്… ടിങ്…