close
Sayahna Sayahna
Search

ഓര്‍മ്മയില്‍ അമ്മ


ഓര്‍മ്മയില്‍ അമ്മ
PranayamOralbum.jpg
ഗ്രന്ഥകർത്താവ് വി എം ഗിരിജ
മൂലകൃതി പ്രണയം ഒരാൽബം
രാജ്യം ഇന്ത്യ
ഭാഷ മലയാളം
വിഭാഗം കവിത
ആദ്യപതിപ്പിന്റെ പ്രസാധകര്‍ ചിത്തിര പബ്ലിഷേഴ്സ്
വര്‍ഷം
1997
മാദ്ധ്യമം പ്രിന്റ്
പുറങ്ങള്‍ 117
ISBN 81-86229-02-07
വായനക്കാരുടെ പ്രതികരണങ്ങള്‍ ഇവിടെ രേഖപ്പെടുത്തുക

ഓര്‍മ്മയിലമ്മ
കണ്ണീരില്‍ക്കുതിര്‍ന്നല്ല,
വിയര്‍പ്പില്‍ നനഞ്ഞല്ല.
ചാരവും കരിയും പുരണ്ടു
തളര്‍ന്നല്ല,
കോപിച്ചിരുണ്ടല്ല,
വിശപ്പുമപമാനവും
പേറിക്കുനിഞ്ഞല്ല,
ഞാനോര്‍പ്പൂ-
കണിക്കൊന്ന പൂത്തപോല്‍
കണിവെള്ളരിക്കയും
കണ്ണാടിയും
തേടിയെവിടെനിന്നോ
കണ്ടെടുത്ത കാണിപ്പൊന്നു-
മഷ്ടമംഗല്യവും
കായും പഴങ്ങളും
ധാന്യവും കണ്ണെഴുത്തും
ചാന്തുകുറിയും നിരന്ന
വിഷുക്കണിപോല്‍
തിളങ്ങുന്ന തിരുമുഖം,
ആര്‍ദ്രമിഴികളാലുഴിയുന്ന
സൂര്യമുഖം,
ഓര്‍മ്മയിലമ്മേ
തിരിച്ചുവരുന്നു
വെടിഞ്ഞു ഞാന്‍ പോന്ന
വീടിന്റെ കുളിര്‍മ്മപോല്‍
ചന്ദനം പോലാമടിവയറ്റിന്‍
സ്നിഗ്ദ്ധചുംബനം.

(1990)