മായം

മായം
ഗ്രന്ഥകർത്താവ്	വി എം ഗിരിജ
മൂലകൃതി	പ്രണയം ഒരാൽബം
രാജ്യം	ഇന്ത്യ
ഭാഷ	മലയാളം
വിഭാഗം	കവിത
ആദ്യപതിപ്പിന്റെ പ്രസാധകര്‍	ചിത്തിര പബ്ലിഷേഴ്സ്
വര്‍ഷം	1997
മാദ്ധ്യമം	പ്രിന്റ്
പുറങ്ങള്‍	117
ISBN	81-86229-02-07
വായനക്കാരുടെ പ്രതികരണങ്ങള്‍	ഇവിടെ രേഖപ്പെടുത്തുക

ചെറിയ കുട്ടിയെ മിട്ടായി നീട്ടി

കളിപ്പാട്ടം കാട്ടി

പ്രലോഭിപ്പിക്കുംപോലെ

നിന്നെ സ്വന്തമാക്കാന്‍

ഞാന്‍ കവിത തരുന്നു

സ്നേഹം തരുന്നു,

ശരീരം,

ഗര്‍ഭപാത്രത്തിന്റെ കാത്തിരിപ്പ്…

കുഞ്ഞിന് അമ്മ നീട്ടുന്ന

കളിപ്പാട്ടമല്ല വേണ്ടത്

വെയിലിന്റെ കിരീടം വേണം,

മഴയുടെ കണ്ണീര്‍ വേണം,

ചളിവെള്ളത്തിന്റെ കിന്നാരം,

ചരല്‍ക്കല്ലുകളുടെ സൗഹൃദം,

കിളികളുടെ തൂവല്‍,

പൂവിന്റെ പാട്ട്,

അമ്മ നല്‍കാത്ത എല്ലാം

അവനു വേണം എന്നറിയാത്തപോലെ

നിനക്കു വേണ്ടത്

എന്റെ ഭ്രാന്തന്‍ സ്നേഹവും

പനി പൊള്ളിക്കുന്ന ഉടലുമല്ല

എന്നു ഞാനറിയുന്നില്ല

നീ ക്ഷമിക്കുക.