സ്വകാര്യപരതേ, നീ തന്നെ ശത്രു

സ്വകാര്യപരതേ, നീ തന്നെ ശത്രു
ഗ്രന്ഥകർത്താവ്	ഡി പങ്കജാക്ഷന്‍
മൂലകൃതി	പുതിയ ലോകം പുതിയ വഴി
രാജ്യം	ഇന്ത്യ
ഭാഷ	മലയാളം
വിഭാഗം	ജീവിതദര്‍ശനം
ആദ്യപതിപ്പിന്റെ പ്രസാധകര്‍	ഗ്രന്ഥകർത്താവ്
വര്‍ഷം	1989

നവ: അതുടനെ പറയാനാവില്ല. ദര്‍ശനം ഇപ്പോള്‍ അമ്പലപ്പുഴയില്‍ ഒരു ഗ്രാമക്കൂട്ടം രൂപപ്പെട്ടതായി പ്രഖ്യാപിച്ചിട്ടുണ്ടല്ലോ? അവിടെയുള്ള വീടുകളിലെ എല്ലാവര്‍ക്കും ഈ ബോധം ഉണ്ടായിട്ടുണ്ടോ?

ഞാന്‍: ഇല്ല; രണ്ടുകൊല്ലം മുന്‍പ് അവിടെ പ്രവര്‍ത്തനം ആരംഭിക്കുമ്പോള്‍ കാഴ്ചപ്പാടിത്രപോലും വ്യക്തമല്ലായിരുന്നു. കഴിഞ്ഞ ക്യാമ്പില്‍ ‘നവസമൂഹരചന ’യെപ്പറ്റി ചര്‍ച്ച നടന്നപ്പോള്‍ വളരെ കുറച്ചു വീട്ടുകാര്‍ മാത്രമേ അതില്‍ പങ്കെടുത്തിരുന്നൊള്ളു.

കേശു: എന്താവാം അതിനു കാരണം?

ഞാന്‍: ഞാന്‍ കണ്ടെത്തിയ കാരണം പറയാം. നാട്ടുകാര്‍ക്ക് ആവശ്യബോധം വന്നിട്ടില്ല. നാം ഭാവന ചെയ്യുന്ന ഈ പുതിയ ലോകം അവരുടെ ഭാവനയില്‍ വന്നിട്ടില്ല.

രാജു: ഞങ്ങളുടെ അറിവ് അങ്ങനെ അല്ലല്ലൊ? കഴിഞ്ഞ ക്യാമ്പില്‍ പങ്കെടുത്ത ഒരു വിദ്യാര്‍ത്ഥിയുമായി ഞങ്ങള്‍ സംസാരിച്ചു. ആ യുവാവ് പറഞ്ഞത് നാട്ടുകാരുടെ ആത്മാര്‍ത്ഥമായ സഹകരണം ഇത്ര ഒരിടത്തും ഉണ്ടായിട്ടില്ല എന്നാണ്.

ഞാന്‍: അങ്ങനെ കുറെ കാര്യങ്ങള്‍ അവിടെ ഇനിയും ഭംഗിയായി നടന്നുവെന്നു വരും. അടുത്ത ക്യാമ്പ് ഇതിലും ഭംഗിയായെന്നും വരാം. എന്നാല്‍ പുതിയൊരു സമൂഹജീവിതത്തെപ്പറ്റിയുള്ള ഭാവന — അതാണു നമുക്കും ലോകത്തിനും രക്ഷാമാര്‍ഗം എന്നൊരു തോന്നല്‍ — അത് നാട്ടുകാരുടെ മനസ്സില്‍ വേരൂന്നിയിട്ടുണ്ടോ? അയല്‍ക്കൂട്ടത്തെപ്പറ്റി സന്തോഷമായി സംസാരിക്കുവാന്‍ തോന്നുന്ന കുറെ വീടുകളും ആളുകളും ഇവിടെ ഉണ്ടായിട്ടുണ്ട് എന്നു പറയാം.