‌← പി.രാമൻ

തുരുമ്പ്
ഗ്രന്ഥകർത്താവ്	പി.രാമൻ
മൂലകൃതി	തുരുമ്പ്
രാജ്യം	ഇന്ത്യ
ഭാഷ	മലയാളം
വിഭാഗം	കവിത
ആദ്യപതിപ്പിന്റെ പ്രസാധകര്‍	ഡി.സി. ബുക്സ്
വര്‍ഷം	2006
മാദ്ധ്യമം	അച്ചടിപ്പതിപ്പ്
പുറങ്ങള്‍	52

പിറന്നാള്‍

നീ പിറന്ന ജൂണ്‍ 11
എന്നത്തേയും പോലെ
അന്നുതന്നെ അസ്തമിച്ചു.
നീ പിറന്നതറിയാതെ
എന്റെ കണ്‍മുന്നില്‍ത്തന്നെ.

ജൂണ്‍ 11
ഓരോ കൊല്ലവും
എന്നെ കടന്നുപോകുന്നു.
ഒരേപോലെ തോന്നിച്ച
ഇരുള്‍രൂപങ്ങളായി.

ഇരുള്‍രൂപങ്ങളെ ഇമചിമ്മിത്തുരന്ന്,

ഞാന്‍ കണ്ടിട്ടും കേട്ടിട്ടുമില്ലാതിരുന്ന നീ പിറന്ന
ആ ജൂണ്‍ 11–ല്‍ നിന്നുള്ള വെളിച്ചം,

ഇങ്ങു പോന്നത്,

ഇന്നേ ഞാനറിഞ്ഞുള്ളൂ.
നീ പിറന്ന ദിവസത്തില്‍നിന്നുള്ള വെളിച്ചം
ഇന്ന് ഇവിടെ എത്തിയപ്പോള്‍.