ദാമ്പത്യം

ദാമ്പത്യം
ഗ്രന്ഥകർത്താവ്	വി എം ഗിരിജ
മൂലകൃതി	പ്രണയം ഒരാൽബം
രാജ്യം	ഇന്ത്യ
ഭാഷ	മലയാളം
വിഭാഗം	കവിത
ആദ്യപതിപ്പിന്റെ പ്രസാധകര്‍	ചിത്തിര പബ്ലിഷേഴ്സ്
വര്‍ഷം	1997
മാദ്ധ്യമം	പ്രിന്റ്
പുറങ്ങള്‍	117
ISBN	81-86229-02-07
വായനക്കാരുടെ പ്രതികരണങ്ങള്‍	ഇവിടെ രേഖപ്പെടുത്തുക

പിന്നെ
തണുത്ത തറയില്‍
കമിഴ്ന്നുകിടന്ന്
ഒരു മഞ്ഞുകൂമ്പാരമായ് ഞാന്‍…
നീയുറങ്ങുന്നു ദൂരെ
നഗ്നനായ്,
പെയ്തുതീര്‍ന്ന മേഘത്തിനെപ്പോലെ
ആശ്വസ്തനായ്.
ഞാനിടിമിന്നല്‍
കീറിപ്പറിച്ച ഭൂമിയായ്
മുറിവേറ്റ്…
മണ്ണടരിനുള്ളില്‍
ആരവം, ചിരി,
യൗവ്വനം, സ്നേഹം.
ആദ്യമായി നീ
ഉടലില്‍ നിറഞ്ഞ നിമിഷം…
ഇതെല്ലാം…
നുണയോ?
തണുത്ത തറയില്‍
നഗ്നശിലാപ്രതിമയായ്
രക്തമൂറും കറുത്ത നിലാവായി… ഞാന്‍

(സമകാലീന കവിത 4, 1991)