ആസാദിനും ചാരുലതയ്ക്കും

ആസാദിനും ചാരുലതയ്ക്കും
ഗ്രന്ഥകർത്താവ്	വി എം ഗിരിജ
മൂലകൃതി	പ്രണയം ഒരാൽബം
രാജ്യം	ഇന്ത്യ
ഭാഷ	മലയാളം
വിഭാഗം	കവിത
ആദ്യപതിപ്പിന്റെ പ്രസാധകര്‍	ചിത്തിര പബ്ലിഷേഴ്സ്
വര്‍ഷം	1997
മാദ്ധ്യമം	പ്രിന്റ്
പുറങ്ങള്‍	117
ISBN	81-86229-02-07
വായനക്കാരുടെ പ്രതികരണങ്ങള്‍	ഇവിടെ രേഖപ്പെടുത്തുക

സ്നേഹത്തോളം നല്ലതാണു

സ്നേഹവാക്കുകള്‍,

സ്നേഹത്തിനോളം വിലപ്പെട്ടതാണു

നനുത്ത ചിരി,

കെട്ടടങ്ങുമെന്നറിഞ്ഞുംകൊണ്ട്

ആളിക്കത്തുന്ന ശുണ്ഠി,

സ്പര്‍ശത്തിന്റെ

മാന്ത്രികലഹരികള്‍,

വല്ലപ്പോഴും താനറിയാതെ

മനസ്സു മൂടുന്ന

മങ്ങിയ വെളിച്ചം,

മഴനനഞ്ഞൊരു രാത്രി

ഇരുളിലൂടെ കൈകോര്‍ത്ത് ഓടല്‍…

പിന്നെ ചുട്ടുപൊള്ളുന്ന ടാറില്‍

കനല്‍ച്ചാട്ടം

എനിക്കറിയാത്ത മനസ്സുകള്‍,

അറിയാത്ത സ്നേഹത്തിന്റെ വഴികള്‍

എനിക്കറിയാവുന്നത്.

ഇത്രമാത്രം

സ്നേഹം പച്ചപ്പും ഉപ്പുമാണ്,

വരിഞ്ഞുമുറുകുന്ന ഞരമ്പും

നനയുന്ന കണ്ണുമാണ്,

എരിയുന്ന ക്രോധവും

പെയ്യുന്ന മനസ്സുമാണ്.