അക്ഷരങ്ങളുടെയും
നിറങ്ങളുടെയും രാജകുമാരി
അറിവിന്റെ
ചെപ്പില്‍നിന്നും
നീ പെറുക്കിയെടുക്കുന്നവ
വാക്കുകളായി
താളുകളില്‍ നിറയുന്നു.
ഒരു കുഞ്ഞക്ഷരമായി ഞാന്‍
മേശയിലിരിക്കുന്നു
വിരലുകളുടെ ചടുലത, വേഗം
എന്നില്‍ വാത്സല്യം നിറയ്ക്കുന്നു.
നിന്റെ അക്ഷരങ്ങളിലൂടെ നടന്ന്
പേനയിലൂടെ കൈവിരല്‍ തുമ്പിലെത്തി
അതില്‍ ഉമ്മവെയ്ക്കുന്നു.
അക്ഷരങ്ങളോട് കുശലം പറയുന്നു
വിരലുകളുടെ നീളങ്ങളില്‍ ഓടിനടക്കുന്നു.
അവയുടെ അനക്കത്താല്‍ പുളകിതനാകുന്നു.
നിറങ്ങളും അക്ഷരങ്ങളും നിറഞ്ഞ
നിന്റെ ഹൃദയമിടിപ്പ് കേൾക്കാനായ്
കൈകളിലൂടെ ഇഴഞ്ഞുകയറി
തോളിലൂടെ ഇറങ്ങി
ഇടതുമുലയ്ക്കിടയില്‍
ഒരു മറുകായ് ഒളിക്കുന്നു
ഒരിക്കല്‍
നീ അത് കണ്ടെത്തി
വിസ്മയത്തോടെ
തൊട്ടുനോക്കുംവരെ.
